काठमाडौं । नेपाली कांग्रेसको १४ औं महाधिवेशन २४ गतेबाट काठमाडौंमा शुरु हुँदैछ । महाधिवेशनको मुखैमा कांग्रेसका गुटै गुटका बैठक जारी छन् ।
महाधिवेशन आउन दुई दिन बाँकी रहँदा कांग्रेस भित्रका विभिन्न गुटहरु उम्मेदवार छान्न बैठकमा व्यस्त छन् ।

संस्थापन पक्षको बैठक सभापति शेरबहादुर देउवाको निजी निवास बुढानीलकण्ठमा जारी छ। बिहानबाट जारी बैठकबाट पदाधिकारी र केन्द्रीय सदस्य चयन गर्ने भनिएको छ । यो पक्षलाई सभापतिमा बाहेकका पदाधिकारी टुङग्याउन गाह्रो भएको बताइएको छ । पदाधिकारीमा नै धेरै आकांक्षि भएकाले सबैको चित्त बुझाउन संस्थापनलाई अप्ठेरो परेको बताइएको छ ।

त्यसैगरी संस्थापन इतर समूहको बैठक बत्तीसपुतलीस्थित अनुपम फुडल्याण्डमा जारी छ । सभापतिको साझा उम्मेदवारबारे छलफल गर्न भन्दै संस्थापन इतर समूहको बैठक अहिले अनुपम फुडल्याण्डमा जारी छ। बैठकमा इतर पक्षले साझा उम्मेदवारबारे आफ्ना पक्षबाट जिल्लाको नेतृत्वमा जितेका, उम्मेदवार बनेका, पूर्व जिल्ला सभापतिहरु र प्रदेशमा सभापति जितेका तथा उम्मेदवार बनेका नेताहरुसँग छलफल गरिरहेको छ । बैठकमा केन्द्रीय सदस्यहरुसमेत सहभागी छन् ।
कांग्रेसमा तेस्रो धार भनिने कृष्णप्रसाद सिटौला पक्षको उनको घरमा बसेको छ । सिटौलाले दिउसो पनि गौशालास्थित आफ्नो सम्पर्क कार्यालयमा दिउँसो पनि बोलाएका छन् ।

विमलेन्द्र संस्थापनबाट बाहिर

संस्थापन पक्षबाट विद्रोह गरेका उपसभापति विमलेन्द्र निधीको पनि गुट छ । बुधबार बसेको संस्थापन पक्षको बैठकमा निधीलाई नबोलाएपछि उनको चौथो गुट तयार हुने बताइएको छ ।

केहि समय पहिला नै उनले संस्थापन पक्षबाट विद्रोह गरेर सभापतिको उम्मेदवारी घोषणा गरेका थिए।

पहिला देखि नै निधीले नयाँ बानेश्वरमा सम्पर्क कार्यालय खोलेरै छलफल र भेटघाट गर्दै आइरहेका छन् । उनले आफ्नो छुट्टै प्यानल नै खडा गर्ने र त्यसको तयारीका लागि छलफलमा रहेको बताएका छन् ।

युवा नेताको दवाव

संस्थापन इतर पक्षका युवा नेता गगनकुमार थापा, चन्द्र भण्डारी, धनराज गुरुङ, सरिता प्रसाई, रामकृष्ण यादव, हृदयराम थामी, कमला पन्त र दीपक गिरी लगायतका नेताहरुले संस्थापन इतरबाट साझा उम्मेदवार तोक्न दवाव दिइरहेका छन् ।