काठमाडौं । राष्ट्रियसभा चुनावका लागि सातवटै प्रदेशमा सत्ता गठबन्धनका र प्रमुख प्रतिपक्ष एमालेका उम्मेदवारले मनोनयन दर्ता गराएका छन् । राष्ट्रियसभाका १९ जना निर्वाचित सदस्य र एक जना मनोनित सदस्यको आगामी २० फागुनबाट कार्यकाल सकिने भएकाले १२ माघमा निर्वाचन हुँदै छ ।
सुदुरपश्चिम प्रदेशबाट गठबन्धनको तर्फबाट नेपाली कांग्रेसको तर्फबाट नारायण मिश्र, माओवादी केन्द्रका तर्फबाट जगत पार्की र एकीकृत समाजवादीका तर्फबाट गरिमा शाहले राष्ट्रियसभा सदस्यका लागि उम्मेदवारी दर्ता गराएका छन् ।
त्यस्तै प्रदेश नं १ मा गठबन्धनको तर्फबाट जसपाबाट हेमराज राई, नेकपा एसबाट जयन्ती राई र कांग्रेसबाट गोपाल बस्नेतले उम्मेदवारी दिएका छन् ।
बागमती प्रदेशमा गठबन्धनबाट गठबन्धनबाट काँग्रेसका कृष्णप्रसाद पौडेल र नेकपा एकीकृत समाजवादीकी गोमा तिमल्सिनाले उम्मेदवारी दर्ता गराएका छन् ।
सुदूरपश्चिम प्रदेशमा नेकपा एमालेका ३ जनाले उम्मेदवारी दर्ता गराएका छन् । मंगलबार धनगढीस्थित प्रदेश निर्वाचन कार्यालयमा एमालेका तर्फबाट तीन जनाले उम्मेदवारी दर्ता गराएका हुन् । एमालेबाट सन्तोष कुमारी शर्मा थापा, नरेश विक र डिल्लीराज भट्टले मनोनयन दर्ता गराएको छ ।
त्यस्तै गण्डकी प्रदेशमा नेकपा एमालेका उम्मेदवारहरुले मनोनयन दर्ता गराएका छन् । जसमा अर्जुनकुमार सुनाम, पुण्यप्रसाद पौडेल र लीला थनेतले मनोनयन दर्ता गराएको हो ।
प्रदेश नं. २ बाट लोकतान्त्रिक समाजवादी पार्टी (लोसपा) ले राष्ट्रिय सभा निर्वाचनका लागि श्याम सरदार र रुपा कुमारी यादवले उम्मेदवारी दर्ता गराएका छन् ।
लुम्बिनी प्रदेशमा नेकपा एमालेका तीन जनाले मनोनयन दर्ता गराएका छन् । जसमा रामदयाल गुप्ता, भारती खनाल र कृष्णबहादुर सुनारले मनोनयन दर्ता गराएका छन् ।
त्यस्तै गठबन्धनको तर्फबाट कांग्रेसको युवराज शर्मा, नेकपा एकीकृत समाजवादीकी राजेन्द्रलक्ष्मी गैरे, राष्ट्रिय जनमोर्चाका तुलप्रसाद बिश्वकर्माले मनोनयन दर्ता गराएका छन् ।
प्रतिक्रिया दिनुहोस्