काठमाडौं । त्रिभुवन विमानस्थलबाट प्रहरीले एक किलो अवैध सुन र मोबाइलसहित तीन जनालाई पक्राउ गरेको छ । एक किलो १५५ ग्राम सुन र पाँचवटा आइफोन १३ प्रो म्याक्स बरामद भएको प्रहरीले जनाएको छ ।
पक्राउ पर्ने मध्ये दुईजना दुबई र एक जना साउदी अरबबाट आएका हुन्।
हिमालय एयरलाइन्सको जहाजमा दुवईबाट आएका रौतहटको गौर नगरपालिका–१० सोबगाढाका ३२ वर्षीय सुनिल कुमार साहबाट चार थान आईफोन, एक थान सुनको बेरुवा औँठी र १५० ग्रामका सुनको सिक्री बरामद गरेको छ।
यस्तै, मकवानपुरको मनहरी–७ का २८ वर्षीय नवराज परियारको साथबाट आईफोन १ थान र सुनको बेरुवा औंठी– २ बरामद भएको छ।
अर्का यात्रु सिन्धुपाल्चोकको भोटेकोशी गाउँपालिका–३ का ३९ वर्षीय दावा छिरिङ शेर्पाको साथबाट बेलनाकार बनाइएको अर्धठोस सुन तीन थान १०५५ ग्राम मलद्वारभित्र लुकाएको अवस्थामा फेला परेको प्रहरीले जनाएको छ। उनी सारजहाबाट एयर अरेबियाबाट नेपाल आएका थिए ।
पक्राउ परेकालाई थप अनुसन्धानका लागि त्रिभुवन विमानस्थल भन्सार कार्यालय, गौचर बुझाइएको छ।
प्रतिक्रिया दिनुहोस्