’ए’ डिभिजन लिग : १३औँ चरणका खेलहरु आजदेखि सुरु

काठमाडौँ । सहिद स्मारक ’ए’ डिभिजन लिग फुटबलमा आजदेखि अन्तिम चरणको खेलहरु सुरु हुँदैछ । आज(बिहीबार) १३ औं चरणका दुई खेलहरु हुनेछन् ।

दशरथ रंगशालामा दिउँसो १ बजे हुने खेलमा हिमालयन शेर्पा क्लब र फ्रेन्ड्स क्लबबीच प्रतिस्पर्धा हुनेछ । १२ खेलमा १३ अंक जोडेर हिमालयन दशौँ स्थानमा रहेको छ भने १२ खेलमा १० अंक जोडेको फ्रेन्ड्स १२ औं स्थानमा रहेको छ ।

आज हुने अर्को खेलमा च्यासल युथ क्लब र सातदोबाटो युथ क्लबबीच प्रतिस्पर्धा हुनेछ । च्यासल र सातदोबाटोको खेल दिउसो १ बजेदेखि एन्फा कम्प्लेक्समा हुनेछ । १२ खेलमा ६ अंक जोडको च्यासल अन्तिममा छ भने सातदोबाटो १२ खेलमा १८ अंक जोडेर पाँचौं स्थानमा रहेको छ । च्यासल यस अघि नै रेलिगेसनमा परिसकेको छ ।