भीम रावलले अनुशासनहीन क्रियाकलाप गरेको ओलीको टिप्पणी

काठमाडौँ । प्रतिनिधिसभामा पार्टीले वेल घेराउ गरिरहेका बेला एमसीसीमाथिको छलफलमा भाग लिएका सांसद भीमबहादुर रावलले अनुशासनहिन काम गरेको एमालेका अध्यक्ष केपी शर्मा ओलीले बताएका छन् ।

एमसीसीमाथि धारणा सार्वजनिक गर्न मंगलबार पत्रकार सम्मेलन आयोजना गर्दै ओलीले पार्टी सल्लाहकार परिषद् सदस्यसमेत रहेका रावलले आत्मकेन्द्रित काम गरिरहेको र त्यसप्रति पार्टीको ध्यानाकर्षण भएको बताए ।

एमसीसीको विरोध गर्ने सांसदलाई के गर्नुहुन्छ भन्ने प्रश्नको जवाफमा प्रमुख प्रतिपक्षी दलका नेतासमेत रहेका ओलीले भने ‘भीम रावल हाम्रो पार्टीको सल्लाहकार परिषद् सदस्य हो । तर उहाँले आत्मकेन्द्रित, आत्मप्रचारक भएर अनुचित र अनुशासनहिन क्रियाकलाप गर्नुभएको छ । त्यस सम्बन्धमा पार्टीको ध्यान गएको छ,।’