काठमाडौं । २०७४ सालको स्थानीय निर्वाचनमा मोरङको मिक्लाजुङमा एमाले नेताले टिकटका लागि मोलमोलाइ गरे ।
मोलमोलाइमा एमालेका तत्कालिन केन्द्रीय सदस्य रुपनारायण श्रेष्ठको नाम जोडियो । त्यही वापत श्रेष्ठले कारबाही भोग्नुपर्यो ।
टिकट बिक्रीमा एमाले नेता भीम आचार्य लगायतको नाम पनि जोडियो ।
हरेक चुनाव स्थानीयदेखि केन्द्रका नेताका लागि कमाउ पर्व बन्न थालेको छ ।
गएको चुनावमा पनि टिकट वितरणलाई लिएर कतिपय नेताहरु विवादमा परे ।
नेपाली कांग्रेसले यसपटक भने समयमै त्यसलाई लगाम लगाएको छ ।
नेपाली कांग्रेसले आगामी प्रतिनिधिसभा र प्रदेशसभा निर्वाचनका लागि पार्टीका तर्फबाट उम्मेदवार सिफारिस गर्दा कुनै पनि शुल्क नलिन मातहतका समितिलाई निर्देशन गरेको छ । पार्टी केन्द्रीय कार्यालयले सोमबार मातहतका कार्यसमितिलाई ‘सर्कुलर’ पठाएर पार्टीका तर्फबाट सिफारिस हुने उम्मेदवारबाट कुनै शुल्क नलिन निर्देशन दिएको जनाएको छ ।
कतिपय पार्टी निकायबाट आगामी निर्वाचनका लागि उम्मेदवारको नाम सिफारिस गर्दा नगद रकम माग गरिएको भन्ने जानकारी प्राप्त हुन आएको भन्दै पार्टी कार्यालयले ध्यानाकर्षण भएको उल्लेख गरेको छ ।
विभिन्न पदीय जिम्मेवारी र लाभको पदमा रहेका पार्टी सदस्यबाट विधान तथा नियमावली बमोजिम सम्बन्धित पार्टी निकायले लिनुपर्ने शुल्क तथा सहयोग रकम बाहेक उम्मेदवार सिफारिस गर्न कुनै पनि प्रकारको रकम माग गर्नु विधान विपरीत कार्य हुने विज्ञप्तिमा उल्लेख छ ।
प्रतिक्रिया दिनुहोस्