काठमाडौं ।काठमाडौं महानगरपालिकाले असोज १ गतेदेखि सार्वजनिक स्थानमा सुर्तीजन्य पदार्थ सेवन गर्न निषेध गरेपनि नागरिकहरुले त्यसको पालना नगरेको जनाएको छ । महानगरले सार्वजनिक सूचना जारी गर्दै असोज १ शनिवारदेखि सार्वजनिक स्थानमा सुर्तीजन्य पदार्थ सेवन गरे एक सय रुपैँया जरिवाना लाग्ने सूचना सार्वजनिक गरेको थियो ।
रत्नपार्क, न्युरोड, असन, सुन्धारालगायत भिडभाड बढी हुने स्थानमा खुलेआम रुपमा सुर्तीजन्य पदार्थ सेवन गनेएको संख्या धेरै भएको प्रमुख बालेन्द्र शाहको सचिवालयले जनाएको छ। नगर प्रहरीहरूले नियमित अनुगमन गरिरहेको र अवज्ञा गर्नेहरूलाई जुनसुकै समयमा कारबाही गर्ने महानगरले तयारी गरेको छ।
सूचनाको अवज्ञा गरेको पाइए सुर्तीजन्य पदार्थ –नियन्त्रण र नियमन गर्ने ऐन २०६८ समेतको आधारमा कारबाही र जरिवाना गर्ने बताएको छ ।नगरसभाको ११ औ अधिवेशनले सार्वजनिक स्थानमा धूम्रपान निषेध गर्ने व्यवस्था प्रभावकारी रुपमा कार्यान्वयन गर्ने नीति यसअघि नै पारित गरिसकेकाले यस व्यवस्था गरिएको काठमाडौं महानगरपालिकाले जनाएको छ ।
प्रतिक्रिया दिनुहोस्