स्रोत नखुलेको १२ लाख रकमसहित २ जना पक्राउ

रौतहट । रौतहटबाट स्र्रोत नखुलेको रकमसहित २ जनालाई पक्राउ गरिएको छ । रौतहटको सदरमुकाम गौर स्थित सशस्त्र प्रहरीको गस्ती टोलीले स्रोत नखुलेको लाखौं रूपैयाँसहित दुई जना युवकलाई नियन्त्रणमा लिएको हो ।

गौर स्थित बरहवा पुल छेउमा सशस्त्र प्रहरीको टोलीले चेकजाँचको क्रममा अवैध रकमसहित दुवै जनालाई बुधबार साँझ पक्राउ गरेको हो । गढीमाई नगरपालिका ४ सग्रामपुरका २९ वर्षीय राजुकुमार यादव र ३३ वर्षीय राजेश कुमार यादवलाई पक्राउ गरेको सशस्त्र प्रहरी रौतहटले जानकारी दिएको छ ।

उनीहरुको साथबाट १२ लाख ६४ हजार ८ सय स्रोत नखुलेको रुपैयाँ बरामद भएको एसपी कार्कीले जानकारी दिएका छन् । बरामद रूपैयाँ, उनिहरुले प्रयोग गरेको प्रदेश ३–०२–०१३ प ४९५६ नम्बरको मोटरसाइकलसहित दुवै जनालाई आवश्यक कारबाहीको लागि जिल्ला भन्सार कार्यालय गौरमा बुझाइएको सशस्त्र प्रहरीले जनाएको छ ।