काठमाडौं । बालुवाटार जग्गा प्रकरणमा पूर्वउपप्रधानमन्त्री एवं नेपाली कांग्रेसका नेता विजयकुमार गच्छदारमाथिको मुद्दा विशेष अदालतमा अहिले सुनुवाइ भइरहेको छ ।
न्यायाधीशत्रय श्रीकान्त पौडेल, रमेशकुमार पोखरेल र यमुना भट्टराईको संयुक्त इजलासमा मुद्दाको सुनुवाइ भइरहेको हो । गच्छदार अदालत पुगेर तारिख बुझेर केहीबेरअघि फर्किएका छन् । मुद्दाका कारण गच्छदारको सांसद पद निलम्बनमा परेको थियो । योपटक सुनसरी ३ बाट उम्मेदवारी दिएका गच्छदार एमालेकी भगवती चौधरीसँग पराजित भए ।
अख्तियारले दायर गरेको मुद्दामा थुनछेक बहसपछि गत असार ३० गते गच्छदारलाई १० लाख रूपैयाँ धरौटी बुझाउन आदेश दिएको थियो ।
पटक–पटक मुद्दाको म्याद बुझ्न अस्वीकार गरेका गच्छदारलाई ‘फरार’ सूचीमा राखिएको थियो । असार ३० गते बिहान गच्छदार आफैं विशेष अदालत पुगेर थुनछेक बहसमा सहभागी भएका थिए ।
गच्छदारले यसअघि देउवालाई आफूमाथि अन्याय भएको भन्दै बालुवाटार प्रकरणबाट जोगाउन आग्रह गर्दै आएका थिए । देउवा प्रधानमन्त्रीमा नियुक्त भएको भोलिपल्टै गच्छदारले अदालतमा आत्मसमर्पण गरेका थिए ।
गत वर्ष फागुनमा विशेषले १५ दिनभित्र अदालत उपस्थित हुनु भनी म्याद पठाएपछि गच्छदार उपस्थित नभई फरार थिए । उनको नाममा पुनः म्याद जारी गरेको थियो । अदालतले दोस्रोपटक गच्छदारको काठमाडौंको स्थायी ठेगानामा म्याद जारी गरेको थियो ।
गच्छदारविरुद्ध ९ करोड ६५ लाख ७६ हजार बिगो माग गर्दै अख्तियारले भ्रष्टाचार मुद्दा दायर गरेको थियो । गच्छदारले सरकारी जग्गा व्यक्तिको बनाउन मन्त्रिपरिषद्मा प्रस्ताव लैजान विभागीय मन्त्रीको रूपमा गैरकानूनी कार्य गरेको अभियोग–पत्रमा उल्लेख छ । ललिता निवासको ११३ रोपनी सरकारी जग्गा व्यक्तिको बनाई भ्रष्टाचार गरेको आरोपमा विशेष अदालतमा २०७६ माघ २२ गते गच्छदारसहित १७५ जनाविरुद्धको मुद्दा विचाराधीन छ ।
प्रतिक्रिया दिनुहोस्