काठमाडौं । संस्कृति नीति बनाउन नेपाल प्रज्ञा प्रतिष्ठानका कुलपति भुपाल राईको संयोजकत्वमा १३ सदस्यीय कार्यदल गठन भएको छ । संस्कृति पर्यटन तथा नागरिक उड्डयन मन्त्रालयले मन्त्रीस्तरीय निर्णय गर्दै उक्त कार्यदल गठन गरेको हो ।
समितिमा पूर्वव्यवस्थापिका सांसद मल्ल के सुन्दर, भाषा आयोगका सदस्य डा. अमर गिरी, मन्त्रालयका संस्कृति महाशाखा प्रमुख दामोदर गौतम, संस्कृतिविद् डा. प्रेम खत्री, संस्कृतिविद् डा. डिल्ली ओली, पूर्वसचिव डा. मानबहादुर विश्वकर्मा, प्रा.डा. विपण पौड्याल, देवशरण यादव, संस्कृति अध्येता भोगीराज चाम्लिङ, चलचित्र निर्देशक नवीन सुब्बा र सदस्य सचिवमा मन्त्रालयको संस्कृति शाखा प्रमुख उपसचिव पुण्यमाया गुरागाईं रहेका छन् ।
संस्कृति पर्यटन तथा नागरिक उड्डयन मन्त्रालय भए पनि विगतमा संस्कृतिबारे उल्लेख्य काम नभएको संस्कृति पर्यटन तथा नागरिक उड्डयनमन्त्री सुदन किराँतीको धारणा छ । नेपाली समाज र संस्कृतिमाथि प्राज्ञिक अध्ययन गरेरमात्र समाज राष्ट्रलाई समृद्ध बनाउन सकिने भएकोले आगामी दिनमा संस्कृतिमाथि बृहत अध्ययन गरिनुपर्ने उनले बताए ।
नेपालको पर्यटन नीति, हवाई उड्डयन नीति र संस्कृति नीति पुरानै भएकाले यसबाट ठोस परिणाम निकाल्न नसकिने भएकोले पनि मन्त्रलयअन्तर्गतका तीनै क्षेत्रको नीति निर्माण गरिने मन्त्री किराँतीले बताए ।
प्रतिक्रिया दिनुहोस्