बिराटनगर\ कुनै दल र गठवन्धनको प्रष्ट बहुमत नहुँदा पटक पटक सरकार परिवर्तन हुँदै आएको कोशी प्रदेशसभाको चौथो अधिवेशन बुधबार सुरु हुँदैछ । मुख्यमन्त्री हिक्मत कार्कीले विश्वासको मत लिने प्रयोजनका लागि आह्वान गरिएको प्रदेश सभाको अधिवेशन दिउँसो १ बजे सुरु हुनेछ ।
प्रदेश मन्त्रिपरिषद्को यही असोज ११ गते बसेको बैठकले प्रदेश प्रमुख परशुराम खापुङलाई प्रदेशसभा अधिवेशनका लागि सिफारिस गरेको थियो ।
२०७९ पुस १७ मा कोशी प्रदेश सभाको दोस्रो कार्यकालको पहिलो बैठक बसेको थियो । प्रदेशसभाको हालसम्म तीन वटा अधिवेशन सकिएको छ । यो अधिवेशनमा असोज २० भित्र मुख्यमन्त्री हिक्मत कार्कीले विश्वासको मत लिनुपर्ने संवैधानिक बाध्यता छ । भदौ २२ मा कार्की मुख्यमन्त्री नियुक्त भएका थिए ।
प्रदेश सभाको प्रथम अधिवेशनमा १३ वटा बैठक सम्पन्न भएको छ । दोस्रोमा ६ वटा, तेस्रोमा ५ वटा बैठक भएको छ । तेस्रोको अन्तिम तथा पाँचौ बैठक अवरुद्ध भएको थियो । प्रदेश प्रमुख खापुङले नेपालको संविधानको धारा १८३ को उपधारा९१० बमोजिम सो बैठक आह्वान गरिएको प्रदेश प्रमुखको कार्यालयका प्रवक्ता नरेन्द्रकुमार श्रेष्ठले जानकारी दिए ।
प्रतिक्रिया दिनुहोस्