पोखरामा कहाँकहाँ पाइन्छ सयपत्री फूल ? कति पर्छ मूल्य ?

पोखरा । पोखरा महानगरपालिकाले नगर क्षेत्रभित्र रैथाने फूलको विक्रीको लागि ठाउँ तोकेको छ । विभिन्न वडाका किसान बजारहरूमा फूल विक्री थालेको हो । आइतबार बिहानदेखि फूल विक्री सुरु भैसकेको कृषि महाशाखा प्रमुख मनहर कडरियाले जानकारी दिए । पोखरा १७ विरौटा, वडा नम्बर १३, पोखरा १६ र १९ को ठूलीपोखरी, अमरसिंहचोक, कोलपाटन र पोखरा ३१ बेगनासमा फूल किन्न पाइन्छ । बेगनासको कोट देउराली सहकारी हो भने अरू सबै स्पट महानगरले नै खोलेको किसान बजार हो ।

स्पटसँगै यो वर्ष महानगरले फूलको मूल्य पनि तोकिसकेको छ । महानगरले फूलको ग्रेड हेरेर मूल्य तोकेको हो । ग्रेड ए को मूल्य प्रतिथुङ्गा ५ रुपैयाँ पर्छ भने बी ग्रेडको ४ रुपैयाँ तथा सी ग्रेडको २ रुपैयाँ पर्छ । माला पनि ए ग्रेडको २ सय, बी ग्रेडको १ सय ८० र सी ग्रेडलाई १ सय ५० पर्छ । ए ग्रेड फूलको प्रतिकिलो ४ सय रुपैयाँ पर्छ ।

महानगरले फूल बिक्रीकै लागि फूल मेला आयोजना पनि गरेको छ । सिद्धार्थ चोकको श्री कम्प्लेक्समा मेला आयोजना गरिएको हो । यो वर्ष फूलको अभाव रोक्न महानगरकै अनुदान सहयोगमा फूल खेती गरिएको छ । १ सय ५० रोपनी क्षेत्रफलमा ५० प्रतिशत अनुदानमा फूल खेती गरिएको हो । पोखरा फूलमा आत्मनिर्भर रहेकोले बाहिरका फूल खरिद नगर्न महानगरले सूचना जारी गरेको छ ।