झापा\ जंगली हात्तीको आक्रमणबाट १ महिनामै झापा, मोरङ र सुनसरी गरी ३ जिल्लामा ५ जनाको ज्यान गइसकेको छ । यी ३ जिल्लामा गत साउनयता ५० भन्दा बढी हात्ती आक्रमणका घटना भएका छन् । सो क्रममा ६ जना घाइतेसमेत भएका छन् । हात्तीको आक्रमणबाट झापा, मोरङ, सुनसरीसहित उदयपुर र इलाममा समेत गरी ३७ लाख ८५ हजार २०० मूल्य बराबरको जनधनको क्षति भएको कोशी प्रदेश प्रहरी कार्यालयको तथ्याङ्कमा उल्लेख छ ।
भारतको आसामबाट झापाको बाहुनडाँगी हुँदै मोरङको जंगल क्षेत्रबाट झण्डै ३७ वटा हात्तीको समूह पूर्वी तराई पसेको विवरण डिभिजन वन कार्यालयको छ । कार्यालयका अनुसार आहारको खोजीमा झापाको हुम्सेदुम्से, शान्तिनगर, बुधबारे हुँदै मोरङको उर्लाबारी, लेटाङ, मिक्लाजुङ, बेलबारी, कानेपोखरी, केराबारी र पथरीमा हरेक वर्ष हुलका हुल हात्ती आउने गरेका छन् । तर, यसअघि १०–१५ दिनमै आफ्ना गन्तव्यमा फर्किने गरेका हात्तीहरू यसपटक लामो समयसम्म नेपालमै बसेका छन् । हात्ती धपाउन स्थानीयलाई मात्र नभएर प्रशासनलाई नै चुनौतीको विषय भएको छ ।
नयाँ विकल्प ड्रोन
हात्ती धपाउने अनेक प्रयास पनि असफल हुँदै गए पछि मोरङको बेलबारीले नयाँ अभ्यास गरेको छ । । झापाको भद्रपुर नगरपालिकामा यसअघि नै परीक्षण गरेको ड्रोनबाट हाती धपाउने प्रयास उसले गर्ने भएको हो । हात्ती धपाउन भनेर २४ वर्षका युवा अनिल प्रधान बेलबारीमा हात्ति धपायरहेका छन ।
साइरन जडान गरिएको ड्रोनको सफल र प्रभावकारी भएको प्रधानले बताएका छन् । उनले सानैदेखि इलेक्ट्रिकको माध्यमबाट समस्या समाधान गर्ने गरेका थिए । त्यसो त उनी आफैँ पनि हात्तीपीडित हुन् । हात्तीले दुःख दिएपछि आफैँले विभिन्न देशबाट सामग्रीहरू ल्याएर ड्रोन बनाएका थिए । यसमा भद्रपुर नगरपालिकाले समेत सहयोग गरेको थियो ।
प्रधानले नजिकै लगेर ड्रोन उडाएपछि आवाज सुनेर हात्ती कराउदै आफू जुन बाटो आएको थियो त्यही बाटो फर्कने गरेको बताए । ठूलो आवाज आउने साइरन जोडेकाले हात्तीको कान छेउमा लगाएर उठाएपछि उ ठूलो आवाजका निकालेर गर्जँदै जंगलतिर भाग्ने गरेको उनले अनुभव साटे । यसरी हुलका हुल हात्ती धपाउने सकिने उनको तर्क छ । राति कतै हात्ती आयो भनेको खबर सुनेमा उनी ड्रोन बोकेर त्यतै जाने गरेका छन् । मध्यरातमा ४० किलोमिटर पर पुगेर पनि हात्ती धपाएको उनले सुनाए ।
प्रतिक्रिया दिनुहोस्