बेलबारी\ जंगली हात्तीको समस्याले आक्रान्त बनेका पूर्वी नेपालका बासिन्दाले नयाँ विकल्पको उपयोग गरेका छन् । खानाको खोजीमा हात्तीको बथान गाउँ छिर्ने गरेको ठहर गरि उनीहरुले वनमै हात्तीका लागि भोजको व्यवस्था गरि दिएका हुन् ।

जंगली हात्तीले गाउँमा पसेर दुःख दिएपछि मोरङको बेलबारी– ११ मा रहेको लक्ष्मी सामुदायिक वन उपभोक्ता समितिले वन क्षेत्रमा नै केराका बोट लगेर राखि दिए पछि हात्ती बस्ति छिरेनन् ।

कोशी प्रदेशका झापा, मोरङ र सुनसरीसहित ३ जिल्लामा करिब एक महिनादेखि हात्ती आतंक छ । भारतबाट आएका हात्तीले दुःख दिने गरेका छन् । यसले बेलबारीमा पनि सीमा नाघ्दै गइरहेको छ । यसैले आफूहरूले हात्ती आउने ३ गौँडामा लगेर १ ट्याक्टर केराका घरीसहितका बोट फालेको लक्ष्मी सामुदायिक वनका अध्यक्ष सुजय गौतमले बताए । २१ हजार मूल्यमा किनेर लगेर हात्ती पस्ने बाटोको मुखमा फालेको उनले जानकारी दिए । केरोका बोट हात्तीले खाएको र गाउँ तर्फ नआएको उनले जनाए ।

हात्तीको आक्रमणबाट १ महिनामै झापा, मोरङ र सुनसरी गरी ३ जिल्लामा ५ जनाको ज्यान गइसकेको छ । यी ३ जिल्लामा गत साउनयता ५० भन्दा बढी हात्ती आक्रमणका घटना भएका छन् । हात्तीको आक्रमणबाट झापा, मोरङ, सुनसरीसहित उदयपुर र इलाममा समेत गरी ३७ लाख ८५ हजार २०० मूल्य बराबरको जनधनको क्षति भएको कोशी प्रदेश प्रहरी कार्यालयको तथ्याङ्कमा उल्लेख छ ।

भारतको आसामबाट झापाको बाहुनडाँगी हुँदै मोरङको जंगल क्षेत्रबाट झण्डै ३७ वटा हात्तीको समूह पसेको विवरण डिभिजन वन कार्यालयको छ । बेलबारी नगरपालिकाले ड्रोनमार्फत हात्ती खेदाउन थालेको छ । हात्ती नियन्त्रणका लागि युवाहरूले रात्रि गस्तीसमेत गर्ने गरेका छन् ।