धरान\ हिन्दूहरुको आस्थाको केन्द्रको रुपमा रहेको सुनसरीको बराहाक्षेत्र तथा मन्दिर कटानको उच्च जोखिममा परेको छ । मन्दिर परिसर क्षेत्रमा बर्सेनि सप्तकोशी नदीले कटान गर्दै आएको छ । यसैविच वराहक्षेत्र नगरपालिकाको पहलमा कोशी प्रदेश सरकारले कटान नियन्त्रणका लागि दुई करोड बजेट विनियोजन भएपछि कटानको स्थायी नियन्त्रणका लागि प्राविधिकले स्थलगत अध्ययन थालिएको हो ।
वराहक्षेत्र नगरपालिका–१ मा रहेको मन्दिर धर्तीको पहिलो तीर्थका रूपमा परिचित छ । वराहक्षेत्र मन्दिरसँगै जोडिएका बस्ती कोशी कटानको उच्च जोखिममा रहेका छन् । नगरपालिकाले सङ्घीय र प्रदेश सरकारसँग समन्वय गरेर वर्षामा हुने कोशी कटान नियन्त्रणका लागि काम अगाडि बढाएको वराहक्षेत्र नगर प्रमुख रमेश कार्कीले जानकारी दिए ।
नगरपालिकाले कोशी कटानको उच्च जोखिममा रहेको वराहक्षेत्र मन्दिरको संरक्षण र नदीको कटान नियन्त्रणका लागि कोशी प्रदेश सरकारका मुख्यमन्त्री केदार कार्कीलाई आग्रह गरिएको थियो । मुख्यमन्त्री कार्कीले तत्कालै काम गर्ने गरी कटान नियन्त्रणका लागि दुई करोड बजेट प्रदेशबाट उपलब्ध गराउने भएपछि प्रदेश र नगरका प्राविधिकले स्थलगत अध्ययन थालेको नगर प्रमुख कार्कीले बताएका छन् ।
प्रतिक्रिया दिनुहोस्