विर्तामोड\ इलामको माई नगरपालिकाबाट झापाको पूर्व–पश्चिम राजमार्ग जोड्ने दुर्गापुर दानाबारी सडकको कालोपत्रे गर्ने कार्य सम्पन्न भएको छ । ट्रयाक खोलेको पाँच दशकपछि बल्ल सडक कालोपत्रे गरिएको हो ।

कोशी प्रदेश सरकारको पहलमा कालोपत्रे भएपछि झापा र दक्षिणी इलामको यात्रा सहज भएको छ । कन्काई नगरपालिका– ७ को दुर्गापुर जोड्ने सडकको ६ किलोमिटर झापा र साढे ६ किलोमिटर इलाम क्षेत्रमा कालोपत्रे भएको हो । सडकमा पर्ने पुलहरु नबन्दा सडक अलपत्र पर्दै आएको थियो ।

झापाको दुर्गापुरबाट इलामको सुखानी जोड्ने सडक कालोपत्रेको ठेक्का २०७८ भदौ ५ मा संझौता भएको थियो । यो सडक दक्षिणी इलामबाट महेन्द्र राजमार्ग जोड्ने सबैभन्दा छोटो दूरीको सडक हो । संघीय सरकारको मातहतमा रहेको सडक प्रदेशमा हस्तान्तरण भएपछि यो सडक कालोपत्र सम्पन्न भएको हो । झापाको दुर्गापूरबाट इलामको सुखानी जोड्ने यस सडक कालोपत्रे ठेक्का संझौता अवधिमा नै सम्पन्न भएको हो ।

अस्पाल प्रविधिबाट सडक कालोपत्रे गरिएको र सबै संरचनाको काम सकिएर सडक समयमै कालोपत्रे भएको पूर्वाधार विकास कार्यालय झापाका प्रमुख रमेश श्रेष्ठले बताएका छन् । सडक कालोपत्रे गर्न ३७ करोड ११ लाखमा ठेक्का आवाह्न भएकोमा २३ करोड ४८ लाखमा संझौता भएको थियो ।