दमक\ नेपाल भारतको पूर्वी नाका हुँदै नेपाल प्रवेश गर्ने जंगली हात्तीले आफ्नो विचरण क्षेत्र फैल्याउँदै लगेका छन् । पश्चिम बंगालसँग सिमा जोडिएका बाहुनडाँगी, शान्तिनगर लगायतका क्षेत्रका अघिल्लो दशक सम्म बढि समस्या हुने गरेकोमा यो बढेर झापाको सिंगो उत्तरी क्षेत्र भरि फैलिएको छ । पछिल्लो समय त बंगाल हुँदै आएका हात्ती बिहार सिमा क्षेत्र तर्फ पनि लम्किन थालेको पाईएको छ ।
झापा पछि उत्तरी मोरङको जङ्गल क्षेत्रका गाउँमा हात्ती आतङ्क भइरहेको बेला मोरङको दक्षिणपूर्वी रतुवामाई नगरक्षेत्रमा पनि हात्ती देखिएका हुन् । उर्लाबारी नगरपालिकाको जङ्गल क्षेत्रबाट जङ्गली हात्ती बस्तीमा प्रवेश गरेपछि स्थानीय बासिन्दा त्रसित भएका छन् ।
रतुवामाई नगरपालिकाको वडा नम्बर ९ स्थित झर्नाटोल हुँदै वडा नम्बर १० को गोप्पेश्वर मन्दिरको रिङरोडबाट राष्ट्रनिर्माण बोर्डिङ स्कुल हुँदै हात्ती उर्लाबारीतिर लागेका छन् । नौ वटा जङ्गली हात्ती बस्तीमा प्रवेश गरेपछि अहिले त्यस क्षेत्रमा ठुलो सङ्ख्यामा सुरक्षाकर्मी परिचालन गरिएको छ ।
स्थानीयका अनुसार हात्ती रतुवामाईको ९ र १० हुँदै उर्लाबारीतर्फ गएको हो । प्रहरीका अनुसार उर्लाबारी ९ बाट बक्राहा खोलातिर गएका हात्ती फेरि उर्लाबारी ८ को कदमटोली प्रवेश गरेका छन् । उर्लाबारी ९ का वडाध्यक्ष नरबहादुर मोक्तानका अनुसार ति हात्ती बक्राहा खोला तर्फ लागेका थिए । त्यहाँ हात्तीले कुनै धनजनको क्षति भने गरेका छैनन् ।
इलाका प्रहरी कार्यालय उर्लाबारीका वरिष्ठ सइ मनोज यादवका अनुसार नौ वटा हात्ती उर्लाबारी ९ को शान्तिक्षेत्र आविको जङ्गल क्षेत्रमा बसिरहेका छन् । दुर्गापुरी क्षेत्रमा देखिएका हात्ती कताबाट आएको एकिन भएको छैन । उत्तरी मोरङबाट आएका हुन वा अलग्गै बथान हो, छुट्याउन सकेका छैनौं । यादवले भने, ‘‘प्रहरी, स्थानीय र वनका प्रतिनिधि भएर अहिले हात्तीबाट हुने क्षति रोक्ने प्रयास भइरहेको छ ।’’
पछिल्लो समय झापा, मोरङ्का वन क्षेत्रमा रहेका हात्तीको बथानका कारण जनजीवन त्रसित भएको छ भने मानवीय क्षती हुने क्रम पनि रोकिएको छैन ।
प्रतिक्रिया दिनुहोस्