काठमाडौँ । प्रमुख प्रतिपक्षी नेकपा एमालेका महासचिव शंकर पोखरेल धरहरा निर्माण कार्य पहिल्यै सम्पन्न भइसकेको बताएका छन् ।

आज (मंगलबार) उनले आफ्नो सामाजिक सञ्जाल फेसबुकमार्फत धरहराको निर्माण कार्य पहिल्यै सम्पन्न भइसकेको बताएका हुन् ।

उनले लेखेका छन् ‘तात्कालीक प्रधानमन्त्रीले नव निर्मित धरहरा उद्घाटन गरेको हो । जसको निर्माण कार्य उतिवेलै सम्पन्न भइसकेको छ ।’ उनले अरु परियोजनाको काम सरकार परिवर्तनका कारणले विलम्ब भएको स्पष्ट पारेका छन् । उनले धरहरा निर्माण सम्झौता पहिले भएका कारणले काम कछुवाको गतिमा भएको बताए ।

उनले परियोजनाको दूरदर्शी दृष्टिकोण र महत्व नबुझ्नेले त्यसको आलोचना गर्नु स्वाभाविक रहेको बताएका छन् । उनले धरहरा पुनर्निर्माण परियोजना अन्तर्गत त्यसलाई नयाँ स्वरूपमा निर्माण गर्नेगरी पाँच भागमा बाँडिएको स्पष्ट पारेका छन् । उनका अनुसार पहिलो पुरानो धरहराको बचेको भागलाई पारदर्शी सिसाले छोपेर जस्ताको त्यस्तै संरक्षण गरी सुरक्षित राख्ने ।

दोस्रो त्यसको छेवैमा पुरानो स्वरूपमा तर नयाँ प्रविधिको प्रयोगरी सुरक्षित धरहराको निर्माण गर्ने । तेस्रो भूकम्पको बारेमा जानकारी गराउने हिसाबले म्युजियम निर्माण गर्ने । चौथो भित्री सहर र पर्यटकको सुविधालाई समेत ध्यानमा राखेर अन्डर ग्राउन्ड पार्किङ स्थल निर्माण गर्ने ।

पाँचौँ अन्डर ग्राउन्ड पार्किङको माथिल्लो भागमा वगैचा निर्माण गर्ने र सुनधारालाई सौन्दर्यीकरण गर्ने । त्यसका लागि गोस्वारा हुलाक समेतको वरिपरिको सरकारी जमिन समेत प्रयोग गरिएको उनले बताए । सोमबार बिहान महानगरपालिकाका मेयर बालेन शाहले धरहराको निःशुल्क पार्किङ बन्द नहुने बताएका थिए । शहरी विकास मन्त्रालयले समन्वय नै नगरी निर्माणाधीन धरहराको बेसमेन्टमा पार्किङ गराएको भन्दै महानगरपालिकाको ध्यानाकर्षण गराएपछि मेयर शाहले पार्किङ बन्द नहुने बताएका थिए ।

उनले २०७८ वैशाख ११ शनिबार अर्थात् आज भन्दा २ वर्ष ९ महिना २० दिन अगाडि तत्कालीन प्रधानमन्त्री केपी ओलीबाट ‘सेतो टावर’ उद्घाटन भयो । सोही उद्घाटनलाई काठमाडौँ तत्कालीन मेयर बिद्यासुन्दर शाक्यले भन्नु भएको थियो, ‘आज एक ऐतिहासिक काम सम्पन्न भएको छ , राणाकालीन अवस्थामा भएको भए केपी ओली टावर भन्थे ।’ तर केहीदिन अगाडि त्यही ठाउँमा सर्वसाधारणका लागि पार्किङ खुला गर्दा पत्र लेखिन्छ, ‘धरहरा निर्माण हुँदैछ । पार्किङ बन्द गर्नु ।’

उद्घाटन गरेको २ वर्ष ९ महिनापछि पनि बनाएर नसकिएको लाज त्यागेर पत्र लेख्नुको औचित्य के हो ? पार्किङ बन्द गर्न महानगरमा पत्र लेख्नु भन्दा तत्कालीन प्रधानमन्त्री केपी ओलीले भन्नु भएको थियो ‘नबनेको भए म बीसौँ तलामा कसरी पुगें’ भनेर निर्लज्ज प्रतिप्रश्न गर्नेहरूलाई पत्र लेख्नु उपयुक्त हुन्छ । उनले लेखेका थिए ।

सहरी विकास मन्त्रालयले धरहरामा पार्किङ नगर्न काठमाडौं महानगरलाई पत्राचार गरेको थियो । पत्राचार पछि पनि पार्किङ काठमाडौं महानगरपालिकाले नरोकेपछि सोमबार सहरी विकासमन्त्री सीता गुरुङले निर्माणाधिन धरहराको भूमिगत पार्किङ नरोके परिणाम राम्रो नहुने चेतावनी दिएकी थिइन् ।

उनले काठमाडौं महानगरपालिकाले निर्माणाधीन धरहराको भूमिगत पार्किङमा कसैसँग पनि समन्वय र छलफल बिना जबरजस्ती रुपमा पार्किङ गराउनु विधि विपरित रहेको बताउँदै निर्माणाधीन धरहरा निर्माण सम्पन्न भएपछि कसरी सञ्चालन गर्ने भन्ने विषयमा कार्यविधि बनाएर जानुपर्ने अवस्था रहेको भन्दै महानगरपालिकाले निर्माण कार्य अवरुद्ध हुनेगरी गरेको निर्णय तत्काल रोक्नुपर्ने बताएकी थिइन् ।