विर्तामोड\ झापाको शिवसताक्षी नगरपालिकाले नौमती बाजाको संरक्षण र प्रवर्धनका लागि महिलालाई नौमती बाजा बजाउने तालिम दिएको छ ।झापामा पछिल्लो पटक कन्काई नगरपालिका र बिर्तामोड क्षेत्रका महिलाले तालिम लिएर व्यावसायिक रूपमै नौमती बाजा बजाउन सुरु गरेसँगै शिवसताक्षी नगरपालिकाले समेत यस प्रकारको तालिमको सुरुवात गरेको हो ।
नयाँ पुस्तामा नौमती बाजाप्रतिको घट्दो आकर्षण र ती बाजा बजाउने मानिसहरूको समेत अभाव भइरहेका बेला शिवसताक्षी नगरपालिकाबाट नौमती बाजाको संरक्षण र प्रवर्धनका लागि स्थानीय महिलालाई नौमती बाजा प्रशिक्षणको तालिम सञ्चालन गरिएको शिवसताक्षी नगरपालिकाका प्रमुख मेगाहाङ्ग थोप्राले बताए ।
कला संस्कृतिको जगेर्नामा सबै जाति र समुदाय लिङ्गको दायित्व बराबरी हुनेभएकाले समेत महिलालक्षित तालिमको आयोजना गरिएको शिवसताक्षी नगरपालिकाका कार्यक्रम अधिकृत महेश लामिछानेको भनाई छ ।
कार्यक्रममा नगरपालिकाको २ लाख ५० हजार र सहभागीबाट ६५ हजार लागत सहभागितासहित २० जना सहभागीलाई १५ दिवसीय प्रशिक्षण प्रदान सुरु गरिएको छ । तालिम पश्चात् एक सेट नौमती बाजा समेत प्रदान गरिने जनाइएको छ ।
प्रतिक्रिया दिनुहोस्