काठमाडौं\ भारतमा हालै सम्पन्न निर्वाचनले निवर्तमान प्रधानमन्त्री नरेन्द्र मोदीलाई कठिन मोडमा ल्याई दिएको छ । एनडीए गठबन्धनले २९२ सिट जितेसँगै नरेन्द्र मोदी तेस्रो पटक भारतको प्रधानमन्त्री बन्ने तरखरमा भए पनि उनको राजनीतिक जीवनको यो कठिन मोड हो ।
उनी फेरि पनि प्रधानमन्त्री बने पनि गठवन्धनको भरमा बन्ने छन् । मोदीले लामो राजनीतिक इतिहासमा पहिलो पटक गठबन्धन सरकारको अभ्यास गर्न लागेका छन् । मोदीको दल भारतीय जनता पार्टीले २४० सिट मात्रै जितेपछि उनी पहिलो पटक गठबन्धन सरकारको प्रधानमन्त्री बन्ने भएका हुन् । विश्व शक्ति राष्ट्रको लक्ष्यमा रहेको भारत र त्यहाँका शक्तिशाली प्रधानमन्त्रीका लागि यो कठिन मोड हो ।
गठबन्धन दललाई विश्वासमा लिएर स्थायीत्व प्रदान गर्नु पर्ने मोदीमाथि अर्को चुनौती थपिएको छ । भाजपासहितको एनडीएले बहुमत ल्याएको छ यही गठबन्धनबाट मोदीे तेस्रो पटक प्रधानमन्त्री बन्नेछन् । गुजरातको मुख्यमन्त्रीदेखि दोस्रोपटक प्रधानमन्त्री हुँदा समेत मोदीले अहिलेसम्म कुनै पनि दलको सहयोग लिनु परेको थिएन ।
सधै एकल बहुमतको सरकार नेतृत्व गर्ने अवसर पाएका मोदीलाई तेस्रो कार्यकालमा भने अन्य दलको भरथेग चाहिने भएको छ । भाजपाले अघिल्लो चुनावमा हासिल गरेका ६३ सीट गुमाएसँगै मोदीलाई अन्य दलको सहयोग जरुरी भएको हो ।
विपक्षी गठबन्धनको मजबुद अवस्था अनि गठबन्धन सरकारको नेतृत्व मोदीका लागि स्थायीत्व जोगाइराख्न नै पहिलो चुनौती भएको छ । विपक्षी नेता राहुल गान्धीले चुनावी परिणामले मोदीको नैतिक हार भइसकेको भन्दै देशलाई मोदीको जरुरी नरहेको पुष्टि भएको प्रतिक्रिया दिइसकेका छन् ।
प्रतिक्रिया दिनुहोस्