काठमाडाैं । नेपाल प्रमियर लिग (एनपीएल) क्रिकेटमा पोखरा एभेन्जर्सले जनकपुर बोल्टसलाई १३९ रनको लक्ष्य दिएको छ ।
बिहीबार बिहान टस हारेर पहिले ब्याटिङको निम्तो पाएको पोखराले निर्धारित २० ओभरमा सात विकेट गुमाएर १३८ रन बनाएको हो ।
पोखराका लागि म्याथु क्रिस्टले बनाएको ३५ रन नै सर्वाधिक रह्यो । ३० बल खेलेका उनले ३ चौका र १ छक्का प्रहार गरे । माइकल लिस्कले २५ रन थपे । १२ बलमा २५ रन बनाएका उनले तीन छक्का प्रहार गरे ।
नारायण जोशी ५ र विपिन खत्री १ रनमा अविजित रहे।
जनकपुरका लागि ललित राजवंशीले ३ विकेट लिए । जेम्स निसमले २ विकेट झारे । मोहम्मद मोहसिन र किशोर महतोले एक विकेट लिए ।
जनकपुरले यसअघिका दुई खेलमा लगातार जीत हात पारेको थियो ।
पोखरा भने पहिलो खेलमा पराजित भएको थियो ।
प्रतिक्रिया दिनुहोस्