मुगु । यतिबेला नेपालको सबभन्दा ठुलो रारा ताल घुम्ने मौसम सुरु भएको छ। अन्य मौसमभन्दा चैतदेखि असार महिनासम्मको समयलाई रारा ताल भ्रमणका लागि उपयुक्त मानिन्छ।

चितवनबाट रारा तालको अवलोकन गर्न आएका अमन पौडेलले यो समयमा राराको मौसम राम्रो पाएको बताउनुभयो। “रारामा आकाशको रङसँगै छिन छिनमा तालको रङ बदलिँदो रहेछ, पानी कहिले निलो बन्छ, कहिले कालो, कहिले सेतो रङसँगै पानीको रङ फेरिँदो रहेछ,” उहाँले भन्नुभयो। आकाशमा मडारिने बाँदलको छाया तालमा पर्दा र बिहान पानी स्थिर भएका बेला तालमा हिमालको छाया टल्किँदा रारा झनै मनमोहक भएको उहाँको अनुभव छ।

रारा राष्ट्रिय निकुञ्ज कार्यालयका अनुसार रारा हेर्न आउने समय चैतदेखि असारसम्म उपयुक्त हुने जनाएको छ। कार्यालयका निमित्त अधिकृत महेश न्यौपानेका अनुसार चालु आर्थिक वर्षको चैत महिनाको पहिलो हप्तासम्म सात हजार ७७९ जना आन्तरिक र १८६ विदेशी पर्यटक रारा घुम्न आएका छन्। रारा ताल समुद्री सतहबाट दुई हजार ८८० मिटरको उचाइमा अवस्थित छ। १६७ मिटर गहिरो, ५.१ किमी लम्बाइ र २.७ किमी चौडाइमा फैलिएको छ। ताल किनारको लम्बाइ १४.६ किमी छ। हिँडेर तालको फन्को मार्न सात घण्टा लाग्छ। रारामा साइक्लिङ गर्न र घोडामा घुम्न मिल्छ तर रारामा पौडी खेल्न र नुहाउन पाइँदैन।

ताल क्षेत्रमा रारा महादेव, छाब्रु महादेव, लगुडा मन्दिर छन्। तालको पूर्वतिर छायानाथ हिमाल पर्छ । छायानाथसँगै ऋणीमोक्ष चुलीमा वर्षैभरि हिउँ रहन्छ। स्थानीय रूपबहादुर मल्लले राराको पर्यटन प्रवर्धनमा तीन तहका सरकारले प्राथमिकतामा नपारेको आरोप लगाउनुभयो। “नियमित उडान, भरपर्दो मोटरबाटो र सुविधायुक्त होटेल जस्ता पूर्वाधार छैनन्, राराको मार्केटिङ हुन सकेको छैन, रारामा योग र ध्यान केन्द्र बन्न सक्छ, त्यतापट्टि कसैको ध्यान गएको छैन,” उहाँले गुनासो गर्दै भन्नुभयो।

पर्यटन व्यवसायी दुर्गा रावलले जुम्लाबाट रारा हुँदै खप्तड, डोल्पा र हुम्लासम्म पुग्ने पदमार्गमा पूर्वाधार विकास गरी मार्केटिङ गर्न सके लामो पदयात्रा गर्न चाहने पर्यटक पनि आकर्षित हुन सक्ने बताउनुभयो । यसका लागि राराबाट छायानाथ, ऋणमोक्ष तीर्थस्थलसम्म पदमार्ग निर्माण हुन जरुरी रहेको उहाँले बताउनुभयो। छायाँनाथ रारा नगरपालिकाले राराको पर्यटन प्रवर्धनका लागि विभिन्न कार्यक्रमको तयारी गरिरहेको नगरप्रमुख विष्णुकुमार भामले बताउनुभयो। उहाँका अनुसार निकट भविष्यमा यहाँका युवाका लागि रोजगारीका अवसर सिर्जना गर्ने उद्देश्यले होटेल, पर्यटक पथप्रदर्शन र पर्यटन व्यवसायसँग सम्बन्धित अन्य तालिम दिने योजना नगरपालिकाको छ।