झापा । झापाको बाह्रदशी गाउँपालिका- १, खयरबारीमा बुधबार दिउँसो भएको सवारी दुर्घटनामा ज्यान गुमाउनेको संख्या तीन पुगेको छ। मोटरसाइकल र स्कुटर एकापसमा ठोक्किँदा दुई जनाको घटनास्थलमै र एक बालकको उपचारका क्रममा मृत्यु भएको हो।
जिल्ला प्रहरी कार्यालय झापाका अनुसार, दुर्घटनामा स्कुटर चालक कचनकवल गाउँपालिका- ३ निवासी ६० वर्षीय श्रीप्रसाद राजवंशी र मोटरसाइकल चालक भारतको किशनगञ्ज, डिगलबैंक निवासी २७ वर्षीय सुरज टुडूको घटनास्थलमै मृत्यु भएको थियो।
दुर्घटनामा गम्भीर घाइते भएका मृतक राजवंशीका ७ वर्षीय नाति आयुष राजवंशीको राति ९ बजे बिर्तामोडस्थित बीएण्डसी अस्पतालमा उपचारका क्रममा मृत्यु भएको प्रहरीले पुष्टि गरेको छ।
यस्तै, घाइते भएकी मृतककी बुहारी २७ वर्षीया उर्मिला राजवंशीको अवस्था गम्भीर रहेको र उनको सोही अस्पतालमा उपचार भइरहेको जनाइएको छ। दुर्घटनामा संलग्न दुवै सवारी साधन इलाका प्रहरी कार्यालय राजगढको नियन्त्रणमा रहेको छ। प्रहरीले घटनाका सम्बन्धमा थप अनुसन्धान जारी रहेको बताएको छ।
प्रतिक्रिया दिनुहोस्