सिद्धार्थ बैंक नेपाल प्रिमियर लिग (एनपीएल) अन्तिम चरणमा प्रवेश गर्दै गर्दा उत्कृष्ट नेपाली खेलाडीलाई प्रदान गरिने कार पुरस्कारका लागि पाँच खेलाडीबीच रोचक प्रतिस्पर्धा देखिएको छ। प्रारम्भिक चरणमा विदेशी खेलाडीको वर्चस्व रहे पनि लिग मध्यतिरदेखि घरेलु खेलाडीको चमक बढ्दै गएको छ। अब फाइनल मात्र बाँकी रहँदा तीन ब्याटर र दुई बलर पुरस्कारको प्रमुख दाबेदारका रूपमा देखिएका छन्।
फाइनलमा लुम्बिनी लायन्स र सुदूरपश्चिम रोयल्स भिड्दैछन्। यी दुबै टोलीका प्रमुख नेपाली खेलाडीको प्रदर्शनले उपाधी र ‘कार अवार्ड’ दुवैमा निर्णायक प्रभाव पार्नेछ।
ब्याटिङ र बलरदुवैतर्फ नेपाली खेलाडीको चमक
सर्वाधिक रनकर्ता सूचीमा पहिलो स्थानमा रहेका पोखरा एभेन्जर्सका इंग्ल्यान्डका एडम रोसिङटन लिग चरणमै बाहिरिएको कारण पुरस्कारको दौडबाट हटिसकेका छन्। यसले दोस्रो स्थानमा रहेका विनोद भण्डारी र तेस्रो स्थानका रोहित पौडेललाई मुख्य दाबेदार बनाएको छ।
बलरमध्ये शीर्ष तीनमा रहेका विराटनगरका सन्दीप लामिछाने, सुदूरपश्चिमका अविनाश बोहरा र लुम्बिनीका शेर मल्लमध्ये सन्दीपको टोली बाहिरिएको छ। जबकि अविनाश र शेर दुवैले उपाधि प्रतिस्पर्धामा रहेका टोलीका मुख्य स्तम्भको भूमिका निभाइरहेका छन्।
१. विनोद भण्डारी – सुदूरपश्चिम रोयल्स
कारका सबैभन्दा बलिया दाबेदार सुदूरपश्चिमका विकेटकिपर ब्याटर विनोद भण्डारी हुन्। आठ खेलमा २६४ रन बनाउँदै उनी ‘टप फ्रेन्चाइजी नेपाली ब्याटर’ बनेका छन्।
२. रोहित पौडेल – कप्तान, लुम्बिनी लायन्स
लुम्बिनीका कप्तान तथा भरपर्दा मध्यक्रमका ब्याटर रोहित पौडेलले ९ खेलमा २६० रन बनाउँदै आफ्नो टोलीलाई फाइनलसम्म पुर्याएका छन्।
३. सन्दीप लामिछाने – विराटनगर किंग्स
सर्वाधिक विकेटका शीर्षस्थानका बलर सन्दीप लामिछानेले ९ खेलमा १७ विकेट लिँदै टुर्नामेन्टका उत्कृष्ट बलरमध्ये एक बने।
४. अविनाश बोहरा – सुदूरपश्चिम रोयल्स
सुदूरपश्चिमका तेज बलर अविनाश बोहरा उत्कृष्ट निरन्तरतासहित कारको बलिया दाबेदार बनेका छन्।
५. शेर मल्ल – लुम्बिनी लायन्स
उदीयमान युवा बलर शेर मल्ल लुम्बिनीको बलिङ आक्रमणको केन्द्र बनेका छन्।
उपाधि र कार दुवैका लागि पाँचै खेलाडी निर्णायक
सुदूरपश्चिमका विनोद–अविनाश र लुम्बिनीका रोहित–शेर फाइनलमा भिड्दैछन्। यही निर्णायक खेल नै कार पुरस्कारको समीकरणलाई अन्तिम मोडमा पुर्याउनेछ। गत संस्करणमा सुदूरपश्चिमका कप्तान दीपेन्द्रसिंह ऐरीले ‘प्लेअर अफ द टुर्नामेन्ट’ बन्दै कार जितेका थिए। यसपटक प्रतिस्पर्धा अझ कडा देखिएको छ। फाइनलमा कसले चम्किन्छ—यही प्रश्न अहिले एनपीएल समर्थकबीच चर्चाको मुख्य विषय बनेको छ।
प्रतिक्रिया दिनुहोस्