फिफा विश्वकप २०२६ अन्तर्गत समूह ‘एल’ मा पूर्व उपविजेता क्रोएसियाले पानामालाई १–० गोल अन्तरले पराजित गर्दै नकआउट चरण पुग्ने सम्भावना बलियो बनाएको छ। यस हारसँगै पानामा समूह चरणको एक खेल बाँकी रहँदै प्रतियोगिताबाट बाहिरिने पहिलो टोली बनेको छ।
टोरन्टोमा सम्पन्न प्रतिस्पर्धात्मक खेलमा क्रोएसियाका लागि वैकल्पिक खेलाडीका रूपमा मैदान प्रवेश गरेका एन्टे बुदिमिर नायक बने। उनले खेलको ५४औँ मिनेटमा गरेको एकमात्र गोल नै टोलीको जितका लागि पर्याप्त बन्यो।
पहिलो हाफ गोलरहित बराबरीमा टुंगिएपछि प्रशिक्षक ज्लाट्को डालिचले दोस्रो हाफ सुरु हुनासाथ टोलीमा आक्रामक परिवर्तन गरेका थिए। त्यसको प्रतिफलस्वरूप जोसिप स्टानिसीचको सटीक क्रसमा बुदिमिरले नजिकैबाट उत्कृष्ट हेडमार्फत गोल गर्दै क्रोएसियालाई अग्रता दिलाए।
यो जित क्रोएसियाका कप्तान लुका मोड्रिचका लागि अझ विशेष रह्यो। ४० वर्षीय अनुभवी मिडफिल्डरले आफ्नो २००औँ अन्तर्राष्ट्रिय खेल खेल्दै इतिहास रचेका छन्। उनी पुरुष अन्तर्राष्ट्रिय फुटबलमा २०० खेल पूरा गर्ने विश्वका चौथा खेलाडी बनेका हुन्। मोड्रिच ८१औँ मिनेटमा मैदानबाट बाहिरिएका थिए।
खेलको पहिलो हाफमा पानामाले तीव्र गतिका आक्रमणमार्फत क्रोएसियामाथि दबाब सिर्जना गरेको थियो। तर प्राप्त अवसरलाई गोलमा परिणत गर्न नसक्दा टोलीले हार बेहोर्नुपर्यो। पहिलो खेलमा इङ्ल्यान्डसँग पराजित भएको पानामाको यो लगातार दोस्रो हार हो।
यस जितसँगै क्रोएसियाले समूह ‘एल’ मा पहिलो तीन अंक जोडेको छ। अब उसले शनिबार घानाविरुद्ध निर्णायक खेल खेल्नेछ। उक्त खेलमा जित निकाले क्रोएसियाले अन्तिम ३२ अर्थात् नकआउट चरणमा स्थान सुरक्षित गर्नेछ।
यसअघि सोही समूहको अर्को खेलमा इङ्ल्यान्ड र घानाले गोलरहित बराबरी खेल्दै अंक बाँडेका थिए, जसले समूहको प्रतिस्पर्धालाई अझ रोमाञ्चक बनाएको छ।
प्रतिक्रिया दिनुहोस्