काठमाडौं । प्रधानमन्त्री शेरबहादुर देउवाले राष्ट्रिय तथा अन्तर्राष्ट्रिय सरकारी तथा गैरसरकारी संस्थाहरू समाजप्रति उत्तरदायी हुनुपर्नेमा जोड दिएका छन् ।
४३ औँ सामाजिक सेवा दिवसका अवसरमा समाज कल्याण परिषद्ले आज विहीबार काठमाडौंमा आयोजना गरेको विशेष समारोहलाई सम्बोधन गर्दे प्रधानमन्त्री देउवाले सरकारी तथा गैरसरकारी संस्थाको सहकार्यमा मात्रै दिगो विकासको लक्ष्य प्राप्त गर्न सकिने विचार व्यक्त गरेका छन् ।
यस अवसरमा प्रधानमन्त्री देउवाले सामाजिक सङ्घसंस्थालाई जनमुखी र पारदर्शी बनाइ कार्य गर्न पनि आग्रह गरेका छन् ।देशको दूरदराजमा समेत गैरसरकारी संस्थाले कल्याणकारी काम गरेको स्मरण गराउँदै प्रधानमन्त्री देउवाले मुलुकको समृद्धि र विकासमा सरकार गैरसरकारी संस्थासँग सहकार्य गरेर अघि बढ्न चाहेको धारणा राखेका छन् ।
कार्यक्रममा महिला, बालबालिका तथा ज्येष्ठ नागरिक मन्त्री उमा रेग्मीले नेपालमा सञ्चालित विभिन्न सामाजिक संस्थाहरूको अनुगमन र मूल्यांकनलाई थप प्रभावकारी बनाइ व्यवस्थित बनाउँनने प्रतिबद्धता व्यक्त गरेकी छन् ।
यस अवसरमा प्रधानमन्त्री देउवाले समाज कल्याण परिषद्को सम्पूर्ण कार्यलाई अनलाइन प्रविधिमा लैजाने डिजिटल पोर्टलकोपनि शुभारम्भ गरेको परिषद्ले जनाएको छ ।
कार्यक्रममा समाज कल्याण परिषद्मा २५ वर्ष सेवा गर्ने कर्मचारीहरुलाई दीर्घ सेवा सम्मानबाट सम्मानित गरिएको थियो ।
प्रतिक्रिया दिनुहोस्