काठमाडाैं । नेपालले काठमाडौंमा जारी त्रिदेशीय महिला टी-२० क्रिकेट सिरिजमा लगातार चौथो हार बेहोरेको छ।
आफ्नो चौथो खेलमा मंगलबार थाइल्यान्डसँग ५ रनले पराजित भएसँगै नेपालको उपाधि यात्रा समाप्त भएको हो।
लगातार चौथो जितसँगै थाइल्यान्ड भने उपाधि नजिक पुगेको छ। उपाधिका लागि मात्र एक जित टाढा रहेको थाइल्यान्डको ८ अंक भएको छ। समान चार खेल खेलेको नेदरल्यान्ड्सको ४ अंक छ। सिरिजमा अब तीनै टिमले समान २ खेल खेल्न बाँकी छ।
कीर्तिपुरस्थित त्रिवि क्रिकेट मैदानमा थाइल्यान्डले दिएको १०७ रनको मध्यम लक्ष्य पछ्याएको नेपालले निर्धारित ओभरमा ८ विकेटको क्षतिमा १०१ रनमात्र बनाउन सक्यो।
अघिल्ला क्रमका ब्याटर दोहोरो अंकको स्कोर नगर्दै पवेलियन फर्केपछि संकटमा परेको नेपालको इनिङ्स रुबिना क्षेत्री र पुजा महतोले सम्हाल्ने प्रयास गरेका थिए। ८ रन जोड्दा ४ विकेट गुमाएको स्थिति सम्हाल्दै रुबिना र पुजाले पाँचौ विकेटका लागि ४८ रनको साझेदारी गरे। रुबिना २६ र पुजा १८ रनमा आउट भए।
नेपाललाई कम योगफलमा रोक्न थिपाच्चा पुथावङले ३ र फनिता मायाले २ विकेट लिइन्।
यसअघि पहिले ब्याटिङ गरेको थाइल्याण्डले निर्धारित २० ओभरमा ६ विकेटको क्षतिमा १०६ रन बनायो। थाइल्याण्डका लागि चनिदा सुथिराङले अविजित २७ र थिपाथ्चा पूथावोङले अविजित २५ बनाए। साथै, नानपत कोन्चारोन्काइले १९ रनको योगदान दिइन्।
नेपालका लागि मनीषा उपाध्यायले तीन विकेट लिइन् पूजा महतो र रचना चौधरीले समान एक/एक विकेट लिए।
सिरिजमा नेपालले बुधबार नेदरल्यान्ड्ससँग र शुक्रबार थाइल्यान्डसँग खेल्नेछ। बिहीबार थाइल्यान्ड र नेदरल्यान्ड्सबीच खेल हुनेछ।
प्रतिक्रिया दिनुहोस्