फिफा विश्वकप फुटबल २०२६ को अन्तिम १६ अन्तर्गत मंगलबार राति अमेरिकाको एटलान्टास्थित स्टेडियममा भएको रोमाञ्चक खेलमा अर्जेन्टिनाले इजिप्टविरुद्ध अविश्वसनीय पुनरागमन गर्दै ३–२ को जित निकालेको छ। यससँगै अर्जेन्टिना प्रतियोगिताको क्वार्टरफाइनल (अन्तिम ८) मा प्रवेश गरेको छ।
खेलको ७८औँ मिनेटसम्म २–० गोलले पछि परेको अर्जेन्टिनाले त्यसपछि मात्र १३ मिनेटको अन्तरालमा लगातार तीन गोल गर्दै सनसनीपूर्ण पुनरागमन गरेको हो।
इजिप्टका लागि १५औँ मिनेटमा यासेर इब्राहिमले पहिलो गोल गर्दै टोलीलाई अग्रता दिलाएका थिए। त्यसपछि ६७औँ मिनेटमा मोस्ताफा जिकोले अर्को गोल थप्दै इजिप्टलाई २–० को बलियो अवस्थामा पुर्याएका थिए।
तर त्यसपछि खेलको चित्र नै बदलियो। ७९औँ मिनेटमा क्रिस्टियन रोमेरोले गोल गर्दै अर्जेन्टिनाको पुनरागमनको आधार तयार पारे। त्यसपछि ८३औँ मिनेटमा कप्तान लियोनल मेसीले बराबरी गोल गर्दै खेललाई २–२ को अवस्थामा ल्याए।
इन्जुरी समयको तेस्रो मिनेटमा एन्जो फर्नान्डेजले निर्णायक गोल गर्दै अर्जेन्टिनालाई ३–२ को अविस्मरणीय जित दिलाए।
अन्तिम क्षणसम्म संघर्षपूर्ण बनेको खेलमा अर्जेन्टिनाले हारको मुखबाट जित निकाल्दै उपाधि यात्रालाई कायम राखेको छ भने इजिप्टको ऐतिहासिक यात्रा अन्तिम १६ मै टुंगिएको छ।
प्रतिक्रिया दिनुहोस्