काठमाडौं उपत्यकामा आज रातिदेखि जोरबिजोर प्रणाली लागु हुँदै

काठमाडौं । कोरोना संक्रमणको दर ह्वात्तै बढेपछि सरकारले यातायात आवागमनमा कडाई गरेको छ । काठमाडौं उपत्यकामा आज शुक्रबाररातिदेखि निजी तथा सार्वजनिक सवारीमा जोर विजोर प्रणाली लागू हुने छ।

काठमाडौं, भक्तपुर र ललितपुरका प्रमुख जिल्ला अधिकारीहरुको बिहीबार बसेको बैठकले यस्तो निर्णय गरेको हो । सार्वजनिक र निजी सवारी साधन जोर गते जोर र बिजोर गते बिजोर नम्बरका मात्र चल्न पाउने छन् । सार्वजनिक सवारीका चालक र सहचालकले मास्क र फेस सिल्ड अनिवार्य लगाउनुपर्नेछ । स्वास्थ्य सामग्री बोकेका सवारीसाधन, एम्बुलेन्स, दमकल, शववाहन तथा पेट्रोलियम पदार्थसहित अनिवार्य आवश्यकता पर्ने ढुवानीका सामान बोकेका सवारीलाई जोर बिजोर लागू हुने छैन ।