सामान्य अंक बढेर रोकियो नेप्से

काठमाडौँ । आज साताको अन्तिम कारोबार दिन बिहीबार नेपाल स्टक एक्सचेञ्ज (नेप्से) परिसूचक ४ अंकले बढेर बन्द भएको छ । दिउँसो साढे १२ बजेसम्म बढेपनि त्यसपछि घट्न थालेको नेप्से अन्तिम समयमा सामान्य बढेर बन्द भएको हो ।यससँगै, नेप्से परिसूचक २०५५ अंकमा पुगेर रोकिएको छ ।

परिसूचक बढेपनि आज १४७ वटा कम्पनीको सेयर मूल्यमा भने गिरावट आएको छ । यस्तै, ७४ कम्पनीको सेयर मूल्य बढ्दा ४ वटा कम्पनीको मूल्य भने स्थिर कायम भएको छ ।परिसूचक बढेको दिन आज ३ अर्ब ४४ करोड रुपैयाँ बराबरको ८० लाख ८ हजार कित्ता सेयर किनबेच भएको छ । यसक्रममा आज ७  वटा कम्पनीको सेयर मूल्यमा उच्च वृद्धि देखिएको छ ।

यसमध्ये ४ वटा कम्पनीको सेयर मूल्य १० प्रतिशतले नै बढेको छ । आज कारोबार भएका १३ मध्ये ४ समूहको सूचकमा मात्रै सुधार आउँदा समग्र परिसूचक बढेर रोकिएको छ । आज होटल, जीवन बीमा, निर्जीवन बीमा र व्यापार समूहको सूचकमा उल्लेखनीय वृद्धि देखिएको छ । यीनै ४ समूहको सूचकमा सुधार आउँदा समग्र परिसूचक बढेको हो ।