काठमाडौं । नेपाली राष्ट्रिय क्रिकेट टोली आज (मंगलबार) ओमान जाने भएको छ । त्यहाँ नेपाली टोली आईसीसी पुरुष टी–ट्वान्टी विश्वकप अन्तर्गत फेब्रुअरी १८ देखि २४ तारिखसम्म हुने ग्लोबल छनोट ‘ए’ मा सहभागि हुनका लागि जान लागेको हो ।
नेपाली टोली राति साढे ८ बजे ओमान प्रस्थान गर्नेछ । ग्लोबल छनोट ए मा नेपालसहित आयोजक ओमान, बहराईन, फिलिपिन्स, जर्मनी, क्यानाडा, आयरल्यान्ड र युएई, छन् । समूह ‘ए’ मा नेपाल, क्यानाडा, फिलिपिन्स र ओमान रहेका छन् ।
समूह ‘बी’ मा युएई, बहराईन, आयरल्यान्ड र जर्मनी छन् । नेपाली टोलीले ओमानसंग खेल्दै खेलको सुरुवात गर्नेछ । नेपाल र ओमानबीचको खेल फेब्रुअरी १८ तारिखमा ओमानमा हुनेछ । नेपालको दोस्रो खेल फिलिपिन्सविरुद्ध अल अमिरात क्रिकेट ग्राउन्डमा फेब्रुअरी १९ मा हुनेछ ।
नेपालले तेस्रो खेल क्यानाडाविरुद्ध ओमान क्रिकेट एकेडेमी ग्राउन्डमा फेब्रुअरी २१ मा खेल्ने तालिका छ । सेमिफाइनल खेलहरु फेब्रुअरी २२ तारिखमा हुनेछ । फाइनल भने फेब्रुअरी २४ तारिखमा ओमान क्रिकेट एकेडेमी ग्राउन्डमा हुनेछ ।
प्रतिक्रिया दिनुहोस्