काठमाडौँ । नेपाली कांग्रेस केन्द्रीय कार्यसम्पादन समितिको बैठक आज(शुक्रबार) दिउसो २ बजे पार्टी केन्द्रीय कार्यालय सानेपामा बस्ने भएको छ ।
स्थानीय तहको निर्वाचन, पार्टीका भातृ तथा शुभेच्छुक संस्थाहरुको महाधिवेशन र एमसीसीलगायतका विषयहरु बैठकका एजेन्डा रहेका छन् ।
समिति गठन भएपछि बिहीबार पहिलोपटक बसेको बैठकमा नेताहरूको बोल्ने क्रम नसकिएकाले आज पुनः बस्न लागेको महामन्त्री गगन थापाले जानकारी दिएका हुन्। उनले भने, “बैठकको पहिलो दिन भातृ तथा शुभेच्छुक संस्थाको अधिवेशन, एससीसी परियोजना र स्थानीय तहको निर्वाचनका बारेमा छलफल भएको थियो । आजपनि त्यही विषयमा बाँकी छलफल गर्नका लागी बैठकलाई निरन्तरता दिन लागिएको हो।”
बैठकमा अधिवेशन हुन बाँकी रहेका १६ जिल्लाको अधिवेशनका विषयमा पनि छलफल भइरहेको बताइएको छ ।
पहिलो दिनको बैठकमा डा शशांक कोइराला, विजयकुमार गच्छदार, सुनील थापा, गोपालमान श्रेष्ठलगायतले आफ्नो धारणा व्यक्त गरेको थिए ।
प्रतिक्रिया दिनुहोस्