काठमाडाैँ । प्रमुख प्रतिपक्षी दल नेकपा एमालेका सचेतक महेश बर्तौलाले १९ पुसमा भारतसँग भएको सम्झौताबारे प्रधानमन्त्री पुष्पकमल दाहाल प्रचण्डसँग जानकारी मागेका छन् ।
बुधबार बसेको कानुन समितिको बैठकमा सचेतक बर्तौलाले भारतले २० करोड रुपैयाँ सिधै खर्च गर्न पाउनेबारे भएको सम्झौताबारे प्रधानमन्त्री प्रचण्डलाई प्रश्न गरेका हुन् ।
उनले यो सम्झौताले नेपालको स्वाधिनता, सार्वभौम सत्ता, राष्ट्रिय स्वतन्त्रता, स्वाभिमानप्रति बेइमानी गरेको बताए। उनले सम्झौताले स्वाभिमानको जरा काट्ने काम भएको बताए। उनले भारत सरकारसँग भएको सम्झौताको प्रतिलिपि सांसदहरुले पाउनुपर्ने बताए।
उनले भने, ‘भारतसँग ५ करोडको जे कार्यान्वयनको प्रक्रिया थियो, त्यो प्रक्रियाका सम्बन्धमा नेपालमा अरु पार्टीका पनि सरकार थिए भन्ने संकेत गर्नुभएको छ। कतिपय कमजोरी बीचमा भएका भएपनि अहिलेको सरकारले सच्याएर नयाँ ढंगबाट जाने हो, कमजोरीलाई सिरानी हालेर अर्को कमजोरी गर्न मिल्छ? नेपालको संविधानको धारा ५ बमोजिमको अहिलेको सम्झौता हो? नेपालको स्वाधीनता, सार्वभौम सत्ता, राष्ट्रिय स्वतन्त्रता, स्वाभिमानलाई जोगाउने गरी यो सम्झौता भएको छ? यो कुरा ठोकुवाका साथ भन्न सक्नुहुन्छ? सम्झौतप्रति तपाई गर्व गर्दै हुनुहुन्छ तर यो सम्झौताले देशको राष्ट्रघात भएको छ। स्वाभिमानको जरा काट्ने काम भएको छ।’
सचेतक बर्तौलाले भारतसँग भएको सम्झौताको दोष अरू सरकारलाई देखाएर पन्छिन नमिल्ने बताए।
प्रतिक्रिया दिनुहोस्