उम्मेद्वारमा महिलालाई प्राथमिकता दिन आयोगको निर्देशन

काठमाडौं । निर्वाचन आयोगले स्थानीय तहको निर्वाचनमा प्रमुख वा उपप्रमुख तथा अध्यक्ष वा उपाध्यक्षमध्ये एक पदमा मात्र उम्मेदवारी दिने राजनीतिक दललाई पहिलो प्राथमिकता महिलालाई दिन निर्देशन दिएको छ ।

निर्वाचन व्यवस्थापनलाई लैंगिक तथा समावेशी मैत्री बनाउन भन्दै स्थानीय तहको निर्वाचनमा सहभागी हुने ७९ वटै राजनीतिक दललाई दिएको १७ बुँदे निर्देशनमार्फत यस्तो भनेको हो ।

आयोगले स्थानीय तह निर्वाचन महिला तथा समावेशी समूहका व्यक्तिलाई निर्वाचन प्रक्रियामा बढीभन्दा बढी सहभागिता र प्रतिनिधित्व गराउनका लागि निर्वाचनमा सहभागी हुने सबै राजनीतिक दललाई पहल गर्न निर्देशन दिएको आयोगका प्रवक्तासमेत रहेका सहसचिव शालिग्राम शर्माले जानकारी दिए । उनका अनुसार आयोगको चैत १६ गतेको निर्णयअनुसार राजनीतिक दल सम्बन्धी ऐन, २०७३ को दफा ५७ बमोजिम १७ बुँदे निर्देशन दिइएको हो ।